صباع الملك!!!
كان في ملك زمان قوي ومستبد أوي وكان ليه واحد صاحبة دايماً بيقول الحمد لله حتى لو اللي حاصل مش حلو ودا كان بيستفز الملك جداً المهم الملك كان بيحب الصيد أوي وفي مرة كان في الغابة بيصطاد مع صاحبة وطلعت طلقة من الصاحب قطعت صباع الملك.
الملك بهدل الدنيا وسجن صاحبه ومش قادر يتخيل إنه ملك ويعيش ب 9 صوابع بس. الصديق دا متضايقش عشان اتسجن وقال الحمد لله قالملك اتغاظ أكتر وخلاه مرمي في السجن.......
بعد فترة الملك نزل يصطاد تاني في الغابة ودخل حتة غلط فقبض عليه ناس غريبة، الجماعة دول أكلة لحوم البشر، كتفوة وبدأو يجهزوه عشان يكلوه بس لما شافو إنه ناقص صباع سابوه يمشي عشان العرف عندهم مينفعش ياكلو حد ناقص!!!!
رجع الملك للقصر وراح السجن حكى لصاحبة فالصاحب قال الحمد لله.... الملك اتزربن فالصاحب قاله الحمد لله عشان أنا اتسببت في قطع صباعك وإلا كان زمانهم أكلوك والحمد لله عشان سجنتني وإلا كان زماني معاك وكان زمانهم أخدوني أنا وأكلوني عشان أنا مش عندي نقص في جسمي...
أعتقد وصل اللي عايزة أقوله من القصة.. كتير الدنيا بيبقى مش باين فيها اي خير ولا فاهمين اللي بيحصل ليه بس لو واثقين في ربنا ومتأكدين إنه بيعمل كل حاجة عشان مصلحتنا حتى لو مش فاهمين الدنيا هيبقى شكلها حاجة تانية خالص....
السبت أغسطس 08, 2009 2:14 pm
